...O_o!!...
在大陸踩單車的親身慘痛經歷(大家要小心啦)
以下是本人的親身經歷, 如有CHING想返大陸踩單車的話, 請自己小心.
這個星期二(5/MAY/09), 同一個朋友上大陸踩單車, 目的地係大鵬所城(參考呢到有位CHING的路線), 由沙頭角起步一路延住海邊踩, 差唔多到達大鵬所城時,在鵬飛路突然我朋友架車同迎頭逆線的一輛單車發生碰撞, 當時個女人同另一個女人并排逆線騎行, 當我朋友經過果兩個女人時, 其中一個女人突然用架車撞向我朋友, 跟住兩個人一起跌落地下, 個女人馬上起身話係我朋友撞佢, 並且話佢手指斷咗(是否真有受傷我都唔清楚), 要求我朋友賠償, 我朋友自己的手腕同肩膀都有撞到而且唔可以活動, 單車也有多處損壞. 在2~5分鐘內有成十幾個紋身佬到達, 話他們係個女人的”老公和同鄉”, 跟住將我同朋友圍住要求我們賠償, 我見咁的情況, 馬上打110要求警方到場處理, 但110中心係在深圳市區, 他們需要轉個CASE俾葵涌交警支隊, 所以需要一段時間才會到達, 這時剛好有一架警車經過, 我馬上攔住佢, 車上只有一名警察, 他落車問完情況後,就問個女人點解逆線行車, 但個警察跟住同我講佢係刑事警察, 交通事故唔係佢管的範圍, 要我打電話叫交通警來, 跟住佢就走咗, 我唯有再打電話要求交通警來處理. 另外因為個女人同我朋友都受咗傷, 我又叫救護車先將佢兩個送去醫院檢查, 我自己就同果個女人的一些”同鄉”(紋身佬)留在現場等交警, 等咗成個鐘交警先來, 交警到咗之後問清楚情況後就叫我俾回鄉證佢, 跟住話我在事發後將我朋友架單車扶起咗, 破壞了現場, 所以要扣我回鄉證. 但對方架單車在事發後即刻有人將單車搬上貨車運走了, 但交警問都唔問, 我即刻同交警講因為當時架單車壓在我朋友身上, 我必須將車扶起才可將我朋友救起, 而對方的單車已經搬離現場為何不扣對方證件而要扣我證件呢 ? 個交警大大聲話: “你點知我唔會扣他們證件, 而家你話事還是我話事 ?”, 我唯有唔出聲. 跟住交警將我朋友的單車搬上警車就開車去醫院問我朋友口供. 我去到醫院時, 個交警扣起了我朋友的回鄉證同單車, 話過幾日再去交警支隊揾佢, 一係叫我朋友賠錢俾個幫人息事寧人, 咁樣就可以即刻走. 我同朋友當時感覺非常無助, 又返唔到香港, 人在他鄉出咗事, 連警察都幫佢地, 我地仲可以做D咩呢 ? 唯有俾錢果幫人息事寧人啦. 跟住我叫果幫人開個價來, 點知一開價就話要一萬蚊人仔, 我地話最多三千, 最後都要三千六才成交, 跟住佢地已經準備好車在醫院出面, 並且送我們去交警支隊簽賠償協議, 簽完後交警先俾返回鄉證同單車我地. 攞到證件後我們馬上坐的士去回羅湖返回香港去醫院檢察, 好彩朋友無骨折.
成件事都好有預謀(交警可能都有份). 香港人在大陸出咗事如果冇後台都幾痳煩. 我諗自己以後唔會再返大陸踩單車., 因為呢D人專係旅遊區搵吃, 好難避的開.
