超极新手南油釣行報告
呢次全船6位都係南油初哥，諗住租快艇即日來回嚟一劑快閃體驗團。
凌晨四點齊集將軍澳碼頭， 艇神亦準時揸艇到達，一番搬搬抬抬萬事就緒，快艇火力全開冒夜極速向油井進發。
三個半鐘後，一座座雄偉嘅油井已在眼前，「艇神」話先試下八支椿有冇魚「呔」，點知船都未埋井，仲有大約一個足球場距離，久聞大名嘅南油拖砵就殺到嚟嘞
一番敵進我退拖拖拉拉，拖砵上面果幾條友見我地唔走，居然狼到擲水樽、玻璃樽！ 怕左佢唯有車遠啲靜候其變（其實係作釣時間有限，真係唔願意轉位，而且目測附近果幾口井都各有拖砵守住，哎）
守左一顆鐘，終於守得雲開見月明，拖砵俾我地嘅真誠打動左，唔再追逐甚至掉頭走埋，哈哈
望下手表，已經九點幾嘞，真係挫晒銳氣，快快手綁釣組，各就各位之際艇神已經揸艇埋井，擺正個船頭候艇開始第一寨！
一聲「落得」，大家歡天喜地鈎餌作釣，殊不知一打開個生艙，驚見事先準備嘅生鉺全部瓜曬，水口太熱同埋行船顛簸，所有小生物都捱唔住上晒天堂，oh my god !
馬死落地行，唯有死魷死池照鈎落去，一於搏大霧
今日個海風不揚波波平如鏡， 一個字「晴朗」，哈哈。望住個大藍水同埋水面一大群斤頭南油池游嚟游去，真係有種置身仙境感覺；
更令我欲仙欲死嘅係攪動自己果抽釣組，真係好能重啊！斤半鉛+天秤+子母擰圈+2條子線2只指公咁大嘅挪威鈎+1死魷1死池 慢放落到海底，手持横攪個深度計顯示水深係94m, 即係完全冇流90度直落，又會咁爽嘅
揚下揚下晃鉺， 揚左5分鐘，預期中嘅深海巨魚都冇嚟搶手袋，有啲小失望； 收幾手絲上到80m, 繼續揚揚下，之前爬文睇得多呢啲橋段，一去到80m就會有大條章紅魚嚟搶食 係80m水深堅持揚左10分鐘， 體力同耐性都有啲受到考驗，好啦收高啲再試下；
如是者，60m,40m,20m, 一路揚揚下上到水面，收返個釣組，一只死魷完整無缺，另一條死池冇左，都唔知係唔係晃鉺動作過大揚甩左，佢老味！
快快手鈎多只死魷，見到只指公挪威鈎個鈎尖突曬出嚟，順手鈎多十只八只南極蝦上去，又拋個釣組落海，一放到底。收高少少繼續「揚揚下」大法
說時遲 那時快，居然有魚搶手袋！我即時進入作戰狀態，雙手持桿，奮力一抽，口中暴喝一句「中！」同船釣友都未有料到，見狀即刻撇低手繩，衝埋我度大聲問「洗唔洗幫手？！」
我都未得閒理佢地，專心上魚，抽得一手就發覺唔多對路，點解冇預期中果種驚人反抗嘅？一直震震下，好似釣左條石九公咁嘅款？ 咁理咁多嘞，快快手收佢上嚟睇下咩料先；
釣友們見我收絲咁輕鬆，估計條魚都唔慌大，放低搭鈎、撈箕慢慢行返曬自己個位坐低繼續釣魚； 我出盡力係咁收，仲越收越快，終於上水啦，磅頭芝麻斑仔一條！全船即時爆出柴台聲，「噓」聲四起，又擲番茄又擲蛋
好嘞喎，話曬都係南油勝利第一擊！仲係石斑喎，你地咁醒釣條斑嚟睇睇？咪踩到咁盡好喎
快快手解魚入生舱，鈎過兩口死魷，拿拿聲拋落海乘勝追擊。
理想係完美嘅現實卻係殘酷嘅，打落個半鐘一直冇魚幫趁過我果兩口死魷，無論海底、中水都好似無生物狀態，哎 祇有水面仲係好熱鬧，一大群大池夾雜住斤幾兩斤重嘅番薯仔圍住船邊游戈，好似示威咁款！
同船釣友到目前為止都仲未有料到，其中3人忍唔住話要變陣，改釣組開始釣池仔嘞 開頭佢地無論用咩方法都釣唔到果啲精過鬼嘅南油池，又幼絲又細鈎都唔食，搶曬所有南極蝦誘鉺就係唔食有鈎果只，吹漲啊佢老味
都係「佐治」夠醒，佢話用雞魚釣組試下喎，又天秤又誘鉺籠，個籠塞滿南極蝦，一條幼子線鈎一隻南極蝦，仲要去頭去尾咁刁轉，服左你！
都係果句「世事無絕對」，佢呢招居然係work!
啲池魚一條接一條咁上水，睇到隔離位個安仔眼都凸，即刻跟紅頂白有樣學樣；於是者啲池仔就越釣越多。
坐喺艇頭嘅tony哥揸住支地拖棍咁粗嘅拖釣桿加大橫攪，呆坐到口都臭埋，佢見到咁嘅景況，拿拿聲收返釣組，搭左條南油池落海底。
呢個世界有樣學樣嘅人寧捨多， 船家「艇神」佢老人家又話要池仔生餌喎，哈哈，仲猛話要大條啲大條啲！ 咁我當然識做，喺生艙撈左條至能大嘅上嚟， 一睇原來係斤半重番薯仔，唔理三七廿一遞左俾阿「艇神」。
佢老人家左手接左條番薯魚鉺，雙眼掛住望個測深機同GPS, 右手喺工具箱求其攞左副手繩，一鈎餌就隨手拋左落海，鉛都唔知有冇加到，佢話放流喎，真係求其到爆！
不過世事就係咁，往往都係「無心插柳柳成蔭」，艇頭個位tony哥都仲未有任何動靜， 反而輪到艇神有大動作啦！佢神色慌張，雙手執絲，條魚絲唔知幾時由彎彎曲曲變左一條直線，仲45度角插向深海！
佢腰馬合一，深深吸一口氣，手臂用盡全力一頂！ 個甫士認真專業，點讚！誰不知隨住佢果盡力一頂，「啪」一聲清脆巨響，條魚絲居然斷！左！
全船人你眼望我眼，當堂靜曬，齊齊望住艇神睇佢有咩解釋， 「艇神」哦哦自言自語：冇理由，副60磅手繩都唔知呔死過幾多條大斑啦，點解咁易斷嘅？冇奶油喎
原來係60磅啊！ 大哥我真係服左你，你望下我果抽釣組，鈎死魷魚仔都用20號碳腳啦，60磅！有冇九兩菜啊！
南油釣魚守則有冇睇過啊大佬？ 第一條就係絲唔怕粗，越粗越好啊（女士們肯定同意啦，咪咁鬼馬諗邪嘢，我只係話魚絲要粗啫，哈哈）
既然艇家靠唔住，唯有自力更生自強不息清者自清濁者自濁咳咳嬲得濟有啲語無論次，sorry... 換過條100磅子線（嗚謝tony哥無私贊助），換左只街市豬肉佬鈎排骨咁Q大隻嘅白鋼鈎（又要鳴謝本群組護法長老Daniel兄），鈎左條成年人腳板咁長嘅南油池落海。
一到底即刻抽高兩手，坐直身，深呼吸，等待一觸即發嘅人獸咳係人魚大戰
呢次都唔洗等待啦，唔夠一陣條絲就係咁震震下，估計海底有大魚游埋嚟，嚇到條池仔魚餌震到賴尿，哈哈； 瞬間震動變作一股強大拉力，我個上半身都俾呢股大力拉郁左，誇能張！
呢次冇死啦，我興奮莫名鬆毛鬆翼， 將支船竿尾插返落肚頂，抬頭挺胸腰馬合一，雙手持桿搏盡老命一嘢抽竿！
「中！」隨住我一聲巨吼，手中船竿已經彎曬，角度仲好變態添！ 坐船尾嘅光仔都忍唔住衝埋嚟諗住幫拖，我話：你扯實我咪俾條魚拉我落海呀。
歡樂時光特別快，但真係快得滯，我用力頂起支桿，順手收左兩圈絲，忽然間魚絲失去左張力，魚竿回彈變返直！咩事啊大佬？唔係斷絲係嗎？咪嚇我啊大佬 垂頭喪氣收返個釣組上水，條池仔當然冇左啦，隻排骨鈎居然完好無缺，原來係爆咀！佢老味（下刪不雅文字一萬字）
都唔敢再望全船钓友嘅奇異眼光，垂低頭快快手鈎多條池仔落海，將功贖罪最實際。如是者又過左兩個鐘都再冇魚食鉺。嬲嬲地將口餌直接放落水底等運到，估唔到個天喺都唔鐘意我，居然掛左地球！ 用盡全力死扯爛扯都扯唔斷，梗係啦100磅子線喎你估流？中魚就易斷啫，中地球點扯都唔斷
努力左5分鐘無果，隨手執起個手絲圈，將布繩卷幾圈上個手絲圈度，出盡九牛二虎之力一扯，「啪」，弊嘞，8號布繩喺個船邊斷左！FUCK!
好啦， 冇得玩啦，灰爆 望下表，時間都唔早嘞，執定嘢睇人釣魚算數。
呢個時候，多數釣友都呈半放棄狀態玩玩下，剩番釣界奇才「佐治」哥仲喺度作最後努力。佢又變陣啦，揸支短又粗船竿，波子鉛死魷魚玩放流，有新意喎抵贊！ 皇天不負有心人，話咁快佢老兄就中魚嘞， 支竿滿曬弓，個磅頂出絲喺咁响到勒！勒聲，激啊！
奇才就係奇才，奇在你估佢唔到，佢話想俾條魚走順啲，所以出手將個磅頂又較鬆幾圈！咁又點呢，咪出事囉，條魚越走越遠，最終走左！ 佐治哥收絲檢查到底衰乜，原來鈎都冇埋（我極度懷疑可能係佢綁鈎綁得差，鬆左，哈哈）
好嘞，上天俾左3次機會我地，全部把握唔到，望下個生艙，只剩返3、4條池仔，一條芝麻仔；
天哪， 出南油慘情釣況聽唔少，但全船魚獲咁能少咁能慘烈，你地見過未？真係木有最慘只有更慘
又到下晝3點，艇神最開心時間到啦，咪係執嘢收艇囉，大家快快手落雨收柴，話咁快摩打聲隆隆隆， 快艇掉頭離開傷心地，回航。
南油， 呢個令我留下深深遺憾嘅鬼地方，我好快會再嚟覆桌，等我！
（全文完，啱睇俾個like啦）
内容来自iPhone手机客户端
